ISLAMABAD, AP.- Un hues pakistani a prohibí tur selebrashon di Dia di San Valentino den kapital di e pais, Islamabad, kalifikando esaki komo profanashon di islam.
E desishon tabata un kontesta pa pedidonan pa prohibí e selebrashonnan públiko di e fiesta, segun funshonario di korte Niaz Sale. El a agregá ku e òrdu a wòrdu manda pa un regulador di medionan di komunikashon di Pakistan pa sigurá ku ningun promoshon pa Dia di San Valentino ta wòrdu transmití, ni via medionan riba papel òf elektróniko.
E sensura ta apliká solamente pa e kapital di Pakistan debí ku e korte di Islamabad no tin poder mas leu ku e siudat.
Ningun evento na nivel ofisial no tin mag di wòrdu realisá na ningun sitio públiko, segun indikashon di e komunikado, sitando e òrdu hudisial.
Djaluna, e gobièrnu a publiká un òrdu pa polis lokal ku ta aprobá e prohibishon. Aña pasa a establesé un òrdu paresido na Islamabad.
E partidonan islamita i derechista di Pakistan ta mira dia di San Valentino komo un kustumber bulgar di oksidente.
Sin embargo, e selebrashon anual di romanse, kada 14 di febrüari, a bira popular durante añanan resien den Medio Oriente, inkluyendo Pakistan.
