WILLEMSTAD.- Pakto pa Punda ta un proyekto ku tur grupo di interes lo mester hinka nan skouder bou di dje pa logra e proyekto aki. Tur e gruponan di interes di mas importante di Punda lo sinta mas pronto posibel na mesa ku otro pa yega na un pakto pa Punda. Den e pakto aki e partidonan lo stipulá kiko nan ke hasi òf kiko mester keda hasi pa Punda, komo sentro di siudat históriko di Willemstad haña un bida nobo. Esaki Castro Communicatie a konsehá riba enkargo di Curacao Tourist Board (ofisina di turismo di Kòrsou).
Pakto pa Punda ta papia di 35 akshon konkreto pa e bientu fresku òf bida nobo por supla den sentro di siudat, e kurason di Kòrsou.
Punda, e bario di mas bieu di Willemstad, ta kore menasa di dekaí den otro. E dinamismo a Sali kompleto for di dje. E situashon aktual ta hasi doló pa e abitantenan ku a keda atras., Nan por konstatá ku tin algun hende ku no tin nan propio pais na kurason.
Masha poko di e edifisionan ta okupá, tin poko aktividat tumando lugá i por nota ku doñonan di edifisionan, empresarionan, organisashonnan i gobièrnu, tur ta mustra dede riba otro i nan ta sinta warda riba akshon.
Dia 4 di desèmber 2022 esta otro aña, Willemstad ta kumpli 25 aña riba e lista di herensia mundial di Unesco. Esaki ta e mihó momentu pa trese bida bek den e área. E gobièrnu nobo tambe a duna indikashon ku nan ke kambia e situashon den Punda. Ta e tempu apropiá pa drei e oloshi pa Punda. E tesoro skondí den Punda, mester Sali na kla. I meta di e plan di akshon di e grupo Castro Communicatie ta pa yuda Punda Sali padilanti lihé. Huntu, mehorashonnan duradero ta posibel solamente di pone tur skouder bou di e proyekto aki.
Kiko mester drecha den Punda?
Pa hopi habitante di Kòrsou, Punda no ta atraktivo mas;
E área apénas ta keda habitá;
Diferente edifisio di gran importansia manera eks sine Cinelandia i tambe e edifisio di ántes Plasa Hotel i tambe rondó di dje ta para ta dekaí;
Tin hopi edifisio bashí i no ta usa hopi parti di e edifisionan;
Den oranan di anochi ta ketu i tin masha poko bida den Punda;
Hopi parti di Punda ta deskuidá i no ta limpi. Tin ophetonan bieu ku no ta ni keda usa mas;
Gobièrnu ta faya ku aktua tantu den e parti di propiedat komo den e esfera públiko;
Hopi habitante, bishitante i asta empresarionan ta haña Punda anochi insigur. No ta hasi uso di e potensial di e bario;
Tin hopi plan ku a keda skibi pa i riba Punda. E plannan aki kasi no a keda ehekutá durante di añanan ku a pasa. Esaki mester por otro.
