DEIR EL-BALAH, Palestina (AFP).- Míles di palestino a selebrá den henter Gaza ayera nochi e notisia di un akuerdo di interupshon temporal dje guera entre Israel i Hamas, despues di diessinku luna di guera.

E firmamentu dje akuerdo, negoshá ku mediashon di Qatar, Egipto i Merka, a keda anunsiá promé pa un fuente yegá na e negosiashonnan i despues a keda konfirmá pa e Promé Minister qatarí.

Na Deir al Balan, den e sentro dje teritorio chikí, algun shen persona rápidamente a manifestá nan legria dilanti dje hospital Al Aqsa, kaminda asina tantu morto a yega for di despues ku e guera a kuminsá. E hendenan tabata balia, saka potrèt i zuai ku bandera palestino.

Na otro sitionan tambe tabatin konsentrashon spontáneo, segun periodistanan di AFP. Nan tabata felisitá otro promé ku e mandatario israelí, Benjamin  Netanyahu, a duna di konosé ku ainda tin algun punto pa atendé dje akuerdo pero ku den oranan di anochi mes lo por a konkluí eseinan.

Segun e Promé Minister di Qatar, Mohamed bin Abdulrahman al Thani, e periodo di pas ta kuminsá djadumingu awor.

Durante dje promé fase, di 42 dia, lo liberá 33 rehen sekuestrá durante dje atake di Hamas riba suela israelí, insidente ku a marka inisio dje guera riba 7 di òktober di aña 2023.

Na Deir al Balah, un hòmber i un periodista ku vèst antibala tabata keda kargá na laira pa un multitut. Nan tabata marcha kantando “Allahu Akbar” (Dios ta esun mas grandi).

 

“Mi ta bai santana”

 

Un grupo di hóben, di mas o ménos dies aña, tabata kanta un kantika popular di resistensia. Randa Samih, kende a pèrdè su kas den e bombardeo, a konta kon el a biba ku e anunsio estando den e kampo di Nuserat i apénas e por a kontené su emoshon.

“Mi no por kaba di kere ku e mal soño akí, ku a dura asina tantu, porfin ta yegando na su final”, segun e palestino di 45 aña. “Nos a pèrdè asina tantu hende, nos a pèrdè tur kos”.

“Nos mester di deskanso. Ora ku e periodo di pas kuminsá lo mi bai santana pa bishitá mi ruman i vários pariente ku a muri den e guera”, segun el a agregá.

“Nos ta regresá na bida. Mi no por kaba di kere ku porfin mi por bolbe mira mi kasá i mi dos yunan. “Mas ku un aña pasá nan mester a hui bai mas den zùit”, segun un hòmber a duna di konosé.

 

LAGA UN KOMENTARIO

Please enter your comment!
Please enter your name here