SIUDAT DI PANAMA, PANAMA, AFP.- Panama lo risibí e promé 12.840 dósisnan di vakuna di Pfizer kontra COVID-19, un karga muchu ménos ku loke a spera debí na un retraso den entreganan di e laboratorio.
“E lote lo yega den avion na aeropuerto Internashonal di Tocumen awe”, segun indikashon di e ministerio di salú den un komunikado.
Segun e nota, Pfizer a notifiká Panama ku lo tin 12.840 dósis di vakuna i no 40.000 manera e gobièrnu panameño i e multinashonal a komprometé na entrega inisialmente promé ku 25 di yanüari.
E gobièrnu di Panama a afirmá ku Pfizer a sigurá ku ta entrega ménos vakuna pa motibu di e planta di produkshon, kual ta limitá suministro pa Europa i algun pais den Latinoamérika.
“Pfizer a informá ku ora reanudá produkshon di e vakunanan lo aselerá tur karga pa Panama haña su dósisnan den e promé trimèster di 2021”, asina e komunikado a agregá.
Panama mester haña 3 mion dósis di e vakuna di laboratorio Pfizer/BioNTech na balor di 36 mion dòler.
Panama ta e di dos pais den Sentroamerika ku ta haña e vakuna kontra e Corona vírus nobo, despues di Costa Rica.
