…Gobièrnu panameño ta para firme ku Kanal di Panamá ta pertenesé na nan pais, miéntras ku Donald Trump tin su bista dirigí riba e kanal…
CIUDAD DE PANAMA (AFP).- Gobièrnu di Panamá ayera a bisa di ta sigui “firme” den defensa di su soberania, despues ku NBC News a publiká ku presidente Donald Trump ta konsiderá na”oumentá” e presensia militar norteamerikano den e pais pa rekuperá e kanal.
NBC News, sitando funshonarionan norteamerikano ku no a keda identifiká, a bisa ku e meta ei “White House a ordená forsanan Armá di Merka pa traha riba opshonnan pa oumentá e presensia di tropanan norteamerikano den Panamá”.
“Relashoná ku e deklarashonnan ei mi no tin nada otro di bisa ku Panamá ta mantené di forma firme e defensa di su teritorio, di su kanal i di su soberania”, segun e kansier panameño, Javier Martinez-Acha, na periodistanan.
Segun NBC News, “Komando Zùit di Merka ta desaroyá plannan potensial ku ta varia for di asosiá su mes mas tantu ku forsanan di seguridat panameño te ku e opshon ménos probabel ku tropanan norteamerikano lo hasi uso di forsa pa tuma Kanal di Panamá”.
E vershon di NBC News riba oumento di presensia militar den Panamá a kousa sorpresa, teniendo kuenta ku ya pa 25 aña no tin presensia di tropanan norteamerikano den e pais.
Merka a invadí Panamá den 1989 pa kapturá e diktador Manuel Antonio Noriega, kende nan a akusá di tráfiko di droga, pero den 1994 a kuminsá sera nan basenan militar den e e pais.
