Presidente panameño José Raúl Mulino ekspresando su mes fuerte dirigí na Merka.
CIUDAD DE PANAMA.- E presidente panameño, José Raúl Mulino, ta eksigí di Merka pa stòp di uso e pais sentroamerikano den su “konflikto” ku China, despues ku e embahada norteamerikano a anunsiá un proyekto pa sustituí ekiponan di komunikashon di e kompania Huawei.
Embahada norteamerikano djárason a sigurá den un nota ku “bou dje liderazgo di presidente Trump, Merka ta trahando pa kontra arestá e mal influensia di China den nos hemisferio, hasiendo e kontinente amerikano mas fuerte i mas sigur”.
Mulino a trese dilanti ku e embahada “no tin motibu pa opiná riba desishonnan ku ta regardá e gobièrnu nashonal” i “muchu ménos via di tipo di komunikado asina purba na hinka Panamá den un konflikto geopolítiko entre China i Merka”.
“Nan bringa nan pelea sea na Washington òf Beijing, pero no den e patio panameño, pues por fabor respetá pa motibu ku Panamá no ta parti dje konflikto ei”, segun e mandatario derechista.
Panamá i Merka tin relashon bilateral tenso riba temanan komersial i e menasanan di Trump di ke “rekuperá” e kanal di Panamá ku e argumento ku esaki ta bou influensia di China.
Panamá den aprel último a firma un akuerdo ku ta duna militarnan norteamerikano espasio pa usa basenan lokal di manera temporal pa training.
“Esaki ta sufisiente, no por sigui asina. “Tur kos ta gobièrnu di Trump ta hasi i tur kos ta gobièrnu di Trump ta finansiá… esei ta un mentira”, segun Mulino a duna di konosé.
