Panameñonan den un marcha di protesta konvoká pa studiantenan universitario kontra di e gobièrnu di presidente José Raúl Mulino den Ciudad de Panamá.
CIUDAD DE PANAMA (AFP).- Míles di studiante i trahadónan a marcha ayera den e kapital di Panamá kontra di un oumento di presensia militar norteamerikano den e kanal di Panamá, tambe kontra dje reapertura di un mina i e reforma di seguro sosial.
Studiantenan, dosente-, obrero- i empleadonan di sektor di salú komo tambe ambientalistanan a rechasá e akuerdo firmá den luna di mart último pa e gobièrnu derechista di José Raúl Mulino i Merka, ku ta permití presensia di tropanan norteamerikano den zonanan di kanal di Panama.
Merka a desmantelá su basenan militar den Panamá na momento ku a entregá esaki na panameñonan riba 31 di desèmber di 199. E kanal marítimo ku a keda konstruí mas ku un siglo pasá. E entrega tabata den kumplimentu ku tratadonan firmá den 1977.
“For di despues ku Mulino a sinta (den yüli di 2024), e kos aki a kana robes”, segun Isaac Alba, un universitario di 27 aña.
E manifestantenan tambe a sigui pa Mulino bandoná e intento pa habri bèk un mina di koper será pa hustisia den 2023, i e proyekto pa habri bèk un kanal di awa, loke lo obligá pa reubiká algun shen famia kampesino.
“E pueblo ta bai den lucha den un esfuerso úniko pa logra para un lei ku a reformá Seguro Sosial i e akuerdo ku e gringonan”, segun lider dje sindikato di konstrukshon, Suntracs.
E konvenio ku Washington a keda firmá den pleno tenshon pa e menasa dje presidente norteamerikano, Donald Trump, di rekuperá e kanal di Panamá ku e argumento ku esaki ta bou di kontròl di China.
