SIUDAT DI VATIKANO, AP.- Papa Fransisco a skibi un karta na presidente venezolano Nicolás Maduro bisando e ku e kondishonnan no ta apto pa un mediashon di Vatikano den e krísis polítiko di e pais suramerikano. Esaki ta konforme di e korant italiano Corriere della Sera.
E korant a sita un karta fechá riba 7 di febrüari, algun dia despues ku presidente Maduro a pidi papa pa yuda inisiá e kombersashonnan ku oposishon. Vatikano no a rospondé mesora na e pedidonan pa un deklarashon.
Djaluna, un delegashon ku ta representá e lider opositor venezolano Juan Guaidó a reuní ku funshonarionan na Vatikano.
Fransisco a deplorá ku e obispunan venezolano a frakasá den nan esfuerso pa yuda separá e situashon polítiko i sosial den e pais, kaminda gran parti di e pueblo ta sufri di skarsedat di kuminda i remedi.
Un bosero di Vatikano, Alessandro Gistorri, a bisa ku Santa Sede “no ta komentá riba kartanan di Papa ku opviamente ta privá”.
E karta ta bisa ku papa ta malkontentu ku e falta di informashon i kontesta di e gobièrnu venezolano tokante disposishon di e Iglesia pa fasilitá un diálogo i logra un rekonsiliashon den Venezuela.
Papa a bisa ku e ta dispuesto na media pero bou di su propio kondishonnan, no esun di Maduro.