BARCELONA, Spaña (AFP).- Papa Leon XIV a trese dilanti ayera ku esnan ku ta kere den Hesus no por ta “promové guera”, den un krítika ku ta bai den direkshon di gobièrnu dje presidente norteamerikano, Donald Trump. “Rumannan stimá, nos no por ta kere den Hesus i ta promové guera. Nos no por ta kere den Hesus i ta mata hendenan inosente”, segun e pontífise durante di un sakrifisio di bisa den e basílika di Sagrada Famia di Barcelona. “Nos no por ta kere den Hesus i ta bandoná esnan ku ta sufri, esnan ku ta yora, esnan ku ta hui di miseria”, segun Papa a sigui bisa dilanti di míles di fiel, entre nan Rei di Spaña Felipe VI.
Papa na kabamentu di mei último a denunsiá e konsepto di “guera hustu”, ku a keda defendé pa e gobièrnu di Trump, pa loke ta trata e guera di Merka i Israel kontra di Iran.
Den un atake sin presedente, Trump den luna di aprel a referí na Papa komo “debil den materia di krímen, i teribel pa polítika eksterior”. Papa a reakshoná bisando di tin e “deber moral pa ekspresá su mes” kontra di guera.
Trump a bolbe kritiká Papa den un entrevista den mei, bisando ku Leon XIV ta konsiderá ku “ta bon ku Iran tin arma nuklear”. “Mi ta kere ku e ta pone hopi katóliko i hopi hende den peliger”, segun e mandatario norteamerikano.
Konsultá riba esaki, e obispu di Roma a bisa ku e mishon di Iglesia Katóliko ta di “prediká pa pas” i Evangelio. “Si un hende ke kritiká mi pa proklamá Evangelio, lag’e hasi esei ku e bèrdat”.
