Papa Leon XIV ta bisa di no tin miedu di Trump

ARGELIA .- Ayera riba e promé dia di su bishita históriko pa ArGelia, Papa Leon XIV a bisa di no tin miedu dje krítikanan di presidente merikano Donald Trump i a referí na su “deber moral” di pronunsiá su mes kontra di guera. Djis un ratu promé ku el a sali for di” Roma, a pontífise nasé na Merka, a bira blanko di krítikanan di parti di Trump, kende a rematá kontra di su komentarionan den kua Leon ta pidi pa pone fin na e guera ku Iran.
“Mi no tin miedu, ni di gobièrnu di Trump, tampoko di proklamá na bos haltu e mensahe di Evangelio”, segun Leon a bisa na periodistanan den e avion papel ku a hib’é Argelia.
“Mi ta kere ku iglesia tin e deber moral di pronunsiá su mes ku tur klaridat kontra di guera i na fabor di pas i rekonsiliashon”, segun el a bisa mas aleu, aunke el a agregá di no ta konsiderá su mes un polítiko i ku e no tin intenshon pa debatí ku Trump.
Djadumingu Trump a bisa ku e no ta un gran atmiradó di e papa i a akus’é di “ta hunga ku un pais (Iran) ku tin arma nuklear”. Riba su ret Truth Social el a kalifiká Papa Leon di ta “débil den materia di krímen i teribel pa polítika eksterior”, sugeriendo ku e kardenalnan solamente a eligí Leon komo papa den mei di 2025 pa motibu ku e ta un merikano i un posibel brùg ku Washington.