SIUDAT DI VATIKANO, SANTA SEDE, AFP.- Papa Fransisco a reforsá su esfuersonan kontra korupshon den Vatikano despues di aprobá leinan nobo pa funshonarionan i eklesiastikonan ku ta traha den “Roman Curia”, e institushonnan atministrativo di Santa Sede.
Fransisco ta eksigí pa tur ehekutivo i personal atministrativo ku ta traha den atministrashon di e iglesia pa deklará ku nan no tin ningun kondena òf investigashonnan di terorismo, labamentu di plaka òf ‘belastingontduiking’ den nan kontra.
Ademas, no ta posibel pa nan tin plaka den paraisonan fiskal i nan no tin pèrmit pa invertí den empresanan ku ta operá “kontra doktrina di e iglesia”, asina e teksto a deklará. “Ta prohibí pa empleadonan aseptá regalo na balor di mas di 40 euro”, segun e dokumento a agregá.
Papa a komprometé na reformá finansa di Vatikano, kual tabata embolbí den vários skandal di invershon i tambe e kier garantisá transparensia den su operashonnan i funshonarionan.
A adoptá e reglanan nobo aki despues ku a formulá esakinan riba 19 di mei 2020. Fransisco a bisa ku esaki ta nesesario “pa motibu ku tin diferente forma di korupshon”.
