ROMA, Italia (AFP).- Papa Leon XIV a kritiká e presensia di forsa militar norteamerikano den Karibe, sin menshoná presidente Donald Trump, i a afirmá ku “hasiendo uso di violensia” ningun hende lo gana. Donald Trump a ordená un importante despliegue militar den Karibe den último simannan, i e forsanan norteamerikano a realisá vários atake riba supuesto barkunan di narkotrafikantenan, durante kua bastante hende a pèrdè nan bida.
Kontestando pregunta di un periodista ora ku el a sali di su residensia na Kastel Gandolfo, Leon XIV a trese dilanti ku un pais tin derechi di tin militarnan pa “defendé pas”. “Pero den e kaso aki ta parse diferente. “E presensia ta oumentá tenshon”, segun e papa di 70 aña, refiriendo na informenan riba barkunan norteamerikano “kada bes mas serka di kosta di Venezuela”.
“Ku violensia nos no ta gana. Loke mester buska ta diálogo”, segun e pontífise norteamerikano, kende tambe tin nashonalidat peruano. E dirigente republikano a afirmá di no tin intenshon pa plania atake kontra Venezuela, kaminda ku e presidente Nicolas Maduro ta sigurá ku Trump ke imponé un “kambio di régimen” pa por tin kontròl di petrolio venezolano.
E papa, nasé na Chicago, tambe a haña un pregunta relashoná ku migrantenan detené den su siudat natal, ku tabata un dje prinsipal metanan di e kampaña di Trump kontra di inmigrantenan. “Hesus a bisa bon kla ku na fin di mundu lo e puntra kon nos a risibí estranheronan, si a risibí nan i duna nan bon biní òf no. ”Mi ta kere ku mester reflekshoná profundamente riba loke ta sosodiendo. “Hopi hende ku a biba durante di añanan largu sin kousa ningun problema a haña nan mes afektá pa loke ta tumando lugá”, segun papa Leon.
Den sèptèmber, Leon XIV a kalifiká komo “trato inhumano” e loke inmigrantenan ta risibí na Merka.
