CASTEL GANCOLFO, Italia.- Papa Leon XIV a kondená e “barbaridat” dje guera den Gaza i a pidi pa pone fin na “uso pa loko di violensia”, poko dia despues di un atake mortal israelí kontra di iglesia katóliko den Gaza.
“Un biaha mas mi ta pidi pa stòp ku e barbaridat dje guera i yega na un resolushon pasífiko dje konflikto”, segun e pontífise na final di e orashon di Angelus.
“Pa desgrasia, e akto aki ta suma na e atakenan militar kontinuo kontra di sivilnan i na lugánan di orashon den Gaza”, el a suprayá.
E atake di ehersito israelí kontra dje úniko misa katóliko den e strep di Gaza djaweps último, a kosta bida di tres persona i heridá vários, entre nan e pastor argentino Gabriel Romanelli.
For di inisio dje guera den òktober di 2023, miembronan di e komunidat katóliko a refugiá den e misa, meskos ku algun kristian òrtodòks.
Durante di misa ayera, Leon XIV a hasi un yamada riba komunidat internashonal pa “respetá e derechi humanitario i obligashon pa protehá sivilnan”, komo tambe “prohibishon di kastigunan kolektivo, e uso no diskriminá di violensia i e desplasamentu fòrsá di e poblashonnan”.
Un dia despues dje atake, Papa a risibí un yamada di e promé minister israelí, Benjamin Netanyahu, na kende el a “reafirmá e nesesidat urgente pa protehá lugánan di orashon i, mas ku tur kos, e fielnan i tur e personanan den Palestina i Israel”, segun un komunikado di Vatikano.
E mesun dia, Netanyahu a bisa di “ta lamentá profundamente” e atake i a rekonosé un “eror”, anunsiando ku Israel lo hasi “un investigashon riba e suseso”.
