Káos kompleto na mayoria aeropuerto na Merka ayera, pa motibu di kanselashon di buelonan..
WASHINGTON (AFP).- Interupshon di tráfiko aéreo na Merka a bira mas serio djadumingu, ku mas di 2.000 buelo kanselá komo konsekuensia dje ‘shut down’ di gobiernu pa falta di un akuerdo polítiko pa presupuesto, ounke kisas den e dianan aki e por keda resolvé despues di 40 dia di duda.
Pa promé biaha den simannan, e aktividat di Senado parse di a indiká un avanse den negosiashonnan entre republikanonan dje presidente Donald Trump i e demokratnan di oposishon pa yega na un salida pa e siere gubernamental mas largu den historia dje pais. E perspektiva di solushon a surgi na un momento ku e káos na aeropuertonan a bira e foko prinsipal dje bataya polítiko pa presupuesto, ku kada partido purbando na akusá e otro pa e trastornonan ku ta afektá pasaheronan rònt e pais.
Te ku ayera nochi, e kantidat di kanselashon di buelo a superá 2.300, ku mas di 8.000 delay, segun datonan di e website FlightAware. For di djabierne, Atministrashon Federal di Aviashon (FAA), e regulador di transporte aéreo norteamerikano, a bin ta hasi yamada riba kompanianan di aviashon pa gradualmente baha nan kantidat di buelo nashonal pa aliviá e preshon riba e kontroladó nan di tráfiko aéreo, kendenan ta traha sin pago.
E Sekretario di Transporte, Sean Duffy, a bisa den Fox News ku tin akuerdo riba presupuesto, ora ku falta poko dia pa Thanksgiving na final di novèmber. E wikènt ei tambe lo marka inisio di temporada di kompra di fiesta di Pasku ku ta importante pa komersio.
Ta spera ku e redukshon gradual di tráfiko aéreo ta alkansá e 10% di buelonan kanselá pa djabierne awor, den komparashon ku 4% aktual, segun Duffy.
Pa e lider dje minoria demokrat, Chuck Summer, a ordunan di kanselashon di buelonan ta “maniobra” polítiko ku “no tin nada di aber ku seguridat.
