Rigerno ‘Jeno’ Schermer a bini for di Ulanda ku intenshon di traha pa e keda su isla Kòrsou. Jeno a biba hopi tempu na Ulanda, kaminda el a studia fishi pero e kier a bin Kòrsou. I aki el a kuminsá ku e negoshi di pone parasòl i stul na playa, den e kaso aki Playa Piskadó na Wespen spesialmente pa bishitantenan.

 

Na Kòrsou sin nada pa hasi

Jeno a konta ku el a mira e idea aki na playa Kenepa. Ora el a pasa e playanan el a mira ku na e playa di piskadó na Wespen tabata falta parasòl i stul. Asina e tabata bai e playa aki konstantemente i un turista a yega di komentá serka dje ku ei bou falta parasòl pasobra solo ta kima. I asina Jeno a pensa ku ta bon kos pa e kuminsá kuné, ya ku e tabata na Kòrsou sin nada pa hasi.

https://youtu.be/LvXu1umlzJ4

 


Despues di 20 aña bèk na Kòrsou

Jeno a biba 20 aña na Ulanda i tin 2 aña aktualmente na Kòrsou i tabatin mester di un trabou. I asina el a kuminsá ku ponementu di parasòl i stul. Jeno a kana e kaminda nèchi, el a buska moda pa sa unda e por haña pèrmit pa asina e pone parasòl i stul ei bou. Dor di puntra puntra el a komprondé ku ta na LVV i el a hiba su karta i den tres siman e por  a kuminsá. Esaki ta promé negoshi ku Jeno tin pero semper tabata su deseo pa tin su propio negoshi i awor su soño a bira realidat. For di na Ulanda el a bai skol pa siña fèrf pa asina e por a habri su mes negoshi. E no a bai na Kòrsou den direkshon di fèrf pero si el a logra su negoshi di hür parasòl i stul. Banda di e stul i parasòl tambe Jeno tin algun brel di duik ku e ta hür ku e turistanan i bishitantenan di e playa.

 

No tabata fásil

Habri un negoshi no ta asina fásil. Jeno mester a buska pa sa unda e ta haña pèrmit pasobra e kier a habri su negoshi legal. I despues ku e pèrmit e tabatin mester di e stul i parasòlnan pa hür. El a konta Djasabra ku el a bende su outo na Ulanda i asina a invertí loke el a haña den e negoshi.

 

 

Harma mainta, desharmá anochi

Tur mainta Jeno ta baha bai playa di piskadó na Wespen, harma su parasòl i stulnan i anochi e ta kita tur kos pa bai kas bèk kuné. Total e tin 8 parasòl i ta intenshon pa e yega 10 parasòl. Tur dia Jeno tin hende ta hasi uso di e parasòl i stulnan. Prinsipalmente ora tin fakansi e tabata hür nan hopi bon i e ta pa tur hende no turista so.

 

 

Turtuga….

Loke ta trese hopi hende na playa piskadó ta e turtuganan ku ta biba ei bou. Jeno ta haña esaki algu masha bon pasobra tabata un playa hopi ketu. Asina e turista yega Kòrsou, ya e sa ku na playa piskadó na Wespen tin turtuga ta landa i ku e landadónan por yega hopi serka di nan. Esaki ta algu úniko den e region aki.

 

Papia i papia….

Jeno ta hasi su mes konosí serka bishitantenan dor di papia i papia. El a konta Djasabra ku ora e trùknan di tur bin ei bou i tambe taksistanan, e ta papia ku nan i hasi su mes konosí. I di mes ora nan tin bishitante nan ta pasa e palabra dor.

 

 

 

 

Den turismo tin trabou

Jeno ta konvensí ku na Kòrsou prinsipalmente den turismo tin hopi kos di hasi. Si hende di afó por haña kos di hasi dikon e hende lokal no por. Den su kaso el a bisa ku tin dia mas drùk ku otro. Den turismo tin futuro aden. Meskos ku esun ku ke logra nan skol ta logr’é. Jeno mes a logra su diploma resien, 4 aña pasá. E ta un persona hopi determiná, ke traha i ta trahando manera mester ta.

LAGA UN KOMENTARIO

Please enter your comment!
Please enter your name here