WILLEMSTAD.- Ayera EXTRA a hiba un kombersashon ku e pareha shofùr di bùs ku djasabra último a bira víktima di un kaso di maltrato ku a laga ámbos heridá.
Ta trata di e pareha Jennifer Eugenia i tambe Maximiliano Wijman.
Tabata djasabra último ku un hòmber aspekto latino kompletamente bou di su awa lo mester a subi den e bùs na e parada na Otrobanda.
Na mitar di kaminda e hòmber a indiká ku e lo mester baha na altura di Roosevelt Center.
Tabata nèt na altura di Sta. Maria Food Center ku e shofùr a indiká na e hòmber ku e lo bah’e einan debí ku e kaminda tabata hopi sera pues ku nan lo no por pasa djei.
E hòmber a habri porta di e bùs pero e lo mester a dal abou.
Despues di esaki e hòmber a lanta i sigui kana sin ku el a paga pa su kareda.
Akinan e shofùr di bùs lo mester a dal e hòmber un gritu i bai su tras ku e bùs indikando na e hòmber ku el a baha sin paga.
E momentu ei e hòmber a saka un papel di Fl.10 i duna e shofùr.
Tabata na momentu ku e shofùr a kana bai bèk na e bùs pa buska sèn sobra e hòmber lo mester a sak abou i kue un baranka i manda esaki dirigí riba e bùs.
Akinan mester a surgi un interkambio di palabra ku a terminá den un maltrato severo.
E hòmber a saka un arma blanku i aki e pareha a hasi uso di un pida heru pa defendé nan mes kuné pero e hòmber sospechoso a hasi uso di e mesun heru pa maltratá e dama kuné miéntras e hòmber a keda hinka ku un kuchú.
Na momentu ku e dama a keda maltratá ku e pida heru mesora e lo mester a bai leu.
Un reshèrshi na sivil ku a presensiá loke a pasa a purba persiguié e hòmber pero sin e resultado deseá debí ku e hamber probablemente lo tabata armá.
Despues di e suseso e pareha a keda dos dia na hospital pa tratamentu médiko.
Mientrastantu ya a hasi 4 dia di e insidente sin ku ainda outoridatnan a realisá detenshon di e persona responsabel apesar ku ámbos shofùr konosé e hòmber aki bon bon i tambe a pasa tur informashon pa outoridatnan.
E pareha awor ta sinta na kas sin un entrada debí ku nan no por kore nan ruta kustumbrá ni tampoko buska muchanan for di skol.
E pareha ta lamentá mas ainda ku no ta dunando e kaso muchu atenshon, e hòmber shofùr a indiká ku si tabata un kaso kaminda ku shofùr di bùs a kometé e agreshon si mesora lo a hasi detenshon i tambe kita su pèrmit.
Pero awor ku ta trata di un pasahero ku outoridatnan tin tur informashon di dje i asta sa unda e ta biba no ta hasi nada ku e kaso.
Un dia promé ku e insidente e mesun shofùr di bùs a keda atraká riba Seru Fortuna pa un persona ku tambe ta konosí pero no a hasi nada ku esei tampoko.
