PARIS, AP.- E monumentonan na Paris ta habriendo su portanan, e trahadónan di limpiesa ta labrando riba kaya i doñonan di vários tienda ta purbando di restourá normalidat den e siudat, despues ku protestanan nobo i disturbionan a laga 71 herido den e kapital franses i kousa daño ekstenso.
E presidente franses Emmanuel Macron a kibra su silensio pa ekspresá su apresio na polis. Ademas, el a sigui wòrdu preshoná pa proponé solushonnan nobo pa kalma e furia ku ta dividí e pais.
E kantidat di herido na Paris i sobra parti di e nashon tabata ménos kompará ku e disturbio di un siman pasa. Pero e despliegue polisial den Fransia no a kambia e posishon di e manifestantenan. 125.000 a sali riba kaya den e pais kompleto ku un serie di demanda, relashoná ku e kosto di bida i krítikanan ku Macron ta faboresé e grupo élite i ku e ta purbando di modernisá e ekonomia demasiado lihé.
1.220 persona a wòrdu detené na diferente parti di e pais, segun indikashon di e ministerio di Interior djadumingu. Polis a revisá manifestantenan na stashonnan di trein den diferente siudat i a konfiská tur opheto ku por a wòrdu usa komo arma.
Eiffel i Museo Louvre a wòrdu habri djadumingu despues di sera komo prekoushon pa e protestanan.