PARIS, AP.- Dos bombero i un siudadano spañó a muri i 47 persona mas a resultá heridá den eksploshon den un panaderia. E eksploshon a wòrdu kousá pa lekashi di gas, segun informashon di outoridat.
E bomberonan a reskatá e víktimanan leshoná via bentana i a saka residentenan for di área di huma.
Ministerio di Interior di Fransia a indiká ku dos bombero i un dama turista spañó a muri den e eksploshon.
Dies persona ta den kondishon grave i 37 di herida ménos severo.
E Minister di Interior, Christophe Castaner a rendi homenahe na miembronan di reskate ku salba bida di un bombero ku a keda pegá bou di e ruina durante dos ora i mei.
Alkaldesa di Paris, Anne Hidalgo, kende tabata na e sitio a “duna un mensahe di afekto i solidaridat” na e víktimanan.
El a agregá ku mayoria residente i turista a wòrdu saká di edifisio i hotèlnan den besindario i ku outoridat di Paris lo ofresé refugio temporal.
E fiskal di Paris, Remy Hetiz, a bisa ku e eksploshon a wòrdu kousá pa un lekashi di gas aksidental. Bomberonan di Paris a bishita e sitio pa investigá e lekashi na momentu di e eksploshon, asina el a agregá.
Unidat di reskate a haña un kadaver bou di e ruinanan di e panaderia destrosá pa e eksploshon potente aki. Outoridat a reportá 3 morto inisialmente pero e deskubrimentu aki ta subi e sifra na 4 víktima mortal pa e eksploshon.
Tabatin mas o ménos 30 bombero ainda na e sitio djadumingu pa kontinuá ku e búskeda pa mas posibel víktima. Asina e bosero di departamento, Eric Moulin a bisa na reporteronan.
