PARIS, AP.- Manifestantenan na Paris ta eksihí medidanan gubernamental mas severo pa evitá ku e hende hòmber ta mata su kasa, frei òf eks pareha.
Fransia a registrá mas di 70 asesinato di e tipo aki te ainda, segun un grupo di Facebook ku ta monitòr e susesonan. Esaki ta un oumentá den e sifranan ofisial di aña pasa. Kada biaha mas persona ta eksihí pa tuma medida kontra e aktonan violento aki.
Mayoria biaha ta trata di hendenan muhé ku a denunsia nan atakante na polis. Un eks minister di derechi di muhé ta eksihí pa hasi un investigashon ofisial interno tokante kon polis a manehá e kasonan.
E manifestantenan den e protesta di djasabra na plasa Republique de Paris kier pa tuma medidanan mas restriktivo kontra hende hòmber abusivo i pa krea sentronan pa e hende muhé ku a wòrdu abusá. Algun persona kier pa tur stashon polisial inkluí ku spesialista ku ta manehá e violensia kontra hende muhé.
E gobièrnu aktual a primintí di aselerá e medidanan pa protehá hende muhé ku ta wòrdu abusá.
