WILLEMSTAD.-Un informe di último ora ku a yega mesa di redakshon di EXTRA ta mustra ku Parlamento di Kòrsou a kanselá e reunion ku tabatin plania pa mayan djaluna 23 di novèmber, den kua lo a trata e lei di eksepshon (uitzonderingswet). E informe di Grefir di Parlamento ta bisa ku a kanselá e reunion te un próksimo aviso i ku presidente di Parlamento lo saka un konvokashon nobo.

E lei di eksepshon aki tin basta tempu (red. for di 2018) den tratamentu den Parlamento. Frakshonnan den oposishon vários okashon ta mustra nan malkontentu ku e formulashon di e konsepto di lei. A bini na diskushon ku Raad van Advies a hala atenshon di gobièrnu pa manda e konsepto bek pa e kolegio pasobra tin kambionan hopi drástiko i komo tal Raad van Advies mester bolbe wak i duna konseho a base di e kambionan.

Tin gruponan di preshon den komunidat ku tambe a ekspresá nan preokupashon relashoná ku e kontenido i implikashon di e lei aki. Riba ret sosial tin un persona Ravelli ku a hasi su análisis di e konsepto di lei mustrando senarionan ku a pone basta hende i grupo den komunidat kuminsá eksigí di gobièrnu pa duna splikashon amplio di e intenshon tras di e lei aki.

Manera indiká Parlamento a trata e lei aki na algun okashon kaba i djaluna 23 novèmber lo mester a pasa e lei aki ku mayoria normal di 11 asiento. Anteriormente e lei mester a haña 2/3 di sosten den Parlamento pa e keda aseptá, pero despues di purba na algun okashon awor si lo por a aprobá e lei ku un mayoria normal.

 

LAGA UN KOMENTARIO

Please enter your comment!
Please enter your name here