Un di e preokupashonnan pa e plaka no resultá den mannan robes
WILLEMSTAD. – Durante debate den Kámara di Representante di Hulanda (Tweede Kamer), parlamentarionan a ekspresá sosten amplio pa e diskulpa pa sklabitut pero ta keda dividí riba fondo di €200.000.000 pa atendé ku e konsekuensia i efekto ku sklabitut a laga riba nos komunidatnan.
19 di desèmber último, minister presidente di Hulanda Mark Rutte a pidi diskulpa pa sklabitut, na mes momento el a anunsiá plan pa un fondo di €200.000.000 destiná pa kontrarestá efektonan negativo ku sklabitut a laga atras, e asina yamá fondo di konsientisashon di sklabitut.
Durante e debate ku a tuma lugá ayera den e kámara di representante di estadonan general hulandes na Den Haag, gran mayoria di parlamentarionan a ekspresá sosten i elogio pa e “palabranan bunita” di Primier Rutte riba 19 di desèmber, pero, e fondo pa konsientisashon di sklabitut a resultá motibu di masha diskushon i desakuerdo. Parlamentarionan ta klaramente dividí riba e tópiko i ta eksigí mas klaridat riba e loke ta bin despues di e famoso “kòma” ku Primier Rutte a pone tras di su deklarashon. Kon ta bai gasta e plaka, e ta sufisiente, òf di mas? Esaki ta algu di e preguntanan ku parlamentarionan a hasi.
Parlamentario Pim van Strien (VVD) ta haña ku e plan pa un fondo pa konsientisashon di sklabitut ta karesé di meta konkreto, frakshon di PVV ta kualifiká e idea komo ridíkulo miéntras Partido SGP ta papia di un rísiko pa trese algu di pasado den presente di e forma aki. Di otro banda Parlamentario Tunahan Kuzu (DENK) ta haña ku mester ankra e diskulpa den lei pa dun’é peso legal. Otronan ta opiná ku ta nesesario pa pone mas fondo un banda pa motibu di duda ku 200 mion euro lo ta sufisiente. PvdA, DENK i BIJ1 ta bisa ku mester bin kompensashon/pago di reparashon na desendientenan di katibu.
Parlamentario Jasse Klaver (GroenLinks) ta sostené e echo ku gobièrnu hulandes no ta dunando masha kontenido na e plan di ehekushon tras di e fondo pa konsientisashon di sklabitut, e tambe ta bisa ku mester laga espasio pa partisipashon sosial den e proseso. Mas miembro di e parlamento hulandes a ekspresá sintimentu i opinion similar. Pa gran parti por bisa ku e kámara di representante ta permanesé kouteloso pa loke ta trata ehekushon di e fondo pa konsientisashon di sklabitut pa na final e plaka no resultá den mannan robes.
