HERUSALEM, AFP.- E parlamento di Israel a vota na fabor di normalisá relashon ku Emirato Árabe Uni i Bahrein despues di un debate largu ku mas di shen diskurso ku a dura mas di ocho ora.
Kasi 80 legislador a vota na fabor di aprobá akuerdonan negoshá ku Merka. Diestres miembro di Lista Árabe Uni di Israel a vota kontra.
“Ku e akuerdo históriko aki nos ta firma dos akuerdo di pas mas”, asina e promé minister Benjamin Netanyahu a bisa. El a agregá ku Israel a kombersá ku algun pais mas den e region pa promé biaha, pero e no a revelá kua pais.
Emirato Árabe Uni a kombertí den e promé nashon árabe ku a normalisá relashon ku Israel desde Egipto na 1979 i Hordania na 1994.
E paisnan a firma e akuerdonan negoshá pa Merka riba 15 di sèptèmber na Kas Blanku. E gobièrnu di Merka ta purbando di negoshá mas akuerdo entre Israel i mas paisnan árabe.
