Plet:
WILLEMSTAD.- Mester yama un reunion públiko pa debatí i eksigí un investigashon independiente na Curçao Gaming Authority (GCA). Un instansia independiente ku por hasi esaki ta Kontrolaria General, kolaboradó di frakshon di MAN-PIN, Yael Plet ta duna di konosé.
E ta mustra ku tin yen informashon ta saliendo, di parti di minister di Finansa, Charles Cooper, ku aparentemente no por mira lus di dia. “Entre otro ku GCA lo ta paga e konsultent Random Consulting Limited den eksterior 8,3 mion florin pa aña pa registrashon di lisensianan ku Kòrsou ta duna pa ‘online gambling’ i ku mester investigá esaki. Cooper ta bisa ku e 8,3 mion florin ku ta paga e kompania ta representá 35 porshento di tur entrada for di e lei di LOK.”
Plet ta mustra ku GCA ta un órgano (“zelfstandig bestuursorgaan”) di gobièrnu ku ta generá entrada for di e lisensianan di “online gambling” pa kaha di gobièrnu. Un di e preguntanan ku segun Plet Parlamento mester para ketu na dje ta: ki proseso a kana pa yega na e kontrato ku e konsultent. “A tene un destaho públiko?”
E ta kere ku Parlamento mester para tras di un investigashon independiente. Pa e motibu aki e kolaboradó di frakshon di MAN-PIN ta kere ku mester yama un reunion públiko i no un reunion di Komishon Sentral pa debatí riba e tópiko i pa Parlamento a base di un moshon yega na un desishon pa laga hasi un investigashon independiente. Plet ta mustra ku ta for di 23 di febrüari 2024 èks minister Javier Silvania a presentá den reunion di Komishon Sentral di Parlamento ku e konsultent aki, Mario Galea, pa durante un reunion tékniko splika dikon mester laga un kompania den eksterior manehá e plataforma di “online gambling” Kòrsou.
“A splika ku ta pasobra e kompania den eksterior tin mas konosementu i eksperensia den e materia. E tempu ei Giselle Mc William i Steven Martina tabata parlamentarionan pa frakshon di partido MAN. Nan a puntra entre otro riba garantianan di protekshon di data i tambe pa haña informashon riba e kontratonan ku a sera.”
Segun Plet a bisa e tempu ei ku pa motibu di akuerdonan di “non disclosure” no por a duna transparensia riba kontratonan ku ta sera ku kompanianan den eksterior. El a sigui mustra ku na fin di 2024, durante tratamentu di presupuesto 2025, tantu Parlamento komo Kolegio Supervishon Finansiero a pidi klaridat riba gastunan di CGA relashon ku “online gambling” kalkulá di ta entre 15 pa 20 mion florin pa aña, pero gobièrnu nunka a duna e klaridat aki.
Na fin di 2024, Silvania a presentá ku e lei di LOK den Parlamento i un mayoria ku ta sostené gobièrnu a pasa e lei sin ku a duna klaridat riba e gastunan. Di otro banda frakshon di MFK a presentá ku un kambio den e lei kaminda mester a reservá 5 porshento di e entradanan for di e lei pa oumentá penshun di behes te na 1.500 florin pa luna, Plet ta sigui splika. “Algu ku te awe ainda no a logra i ku entretantu por bisa ku tabata santu ku a tira den wowo di pueblo.”
Ta bisa aserka, Plet ta bisa mas aleu ku e hunta di komisario kompletu di CGA a tuma retiro i te awe no sa dikon a hasi esaki. “Despues a mira ku gobièrnu a saka e asuntu di ‘online gambling’ for di e kartera di Finansa i a pasa esaki pa minister di Hustisia, pero tabata eks minister di Finansa, Javier Silvania ku a kana ku e lei for di 2022 i a bisa ku e lei di LOK tabata su logra mas grandi. Pregunta ta pues, dikon a kit’e for di Silvania?”
Mas pregunta ku Plet tin, ta: “Ta loke ku ta sali na kla aworakí ta motibu ku e hunta di komisario a tuma su retiro den pasado i ta motibu dikon a kita “online gambling” for di èks minister Silvania?” Finalmente, Plet ta enfatisá ku frakshon di MAN-PIN den Parlamento en todo kaso ta ful di akuerdo ku mester hasi un investigashon profundo i independiente riba e gastunan di GCA relashoná ku e lei di LOK.
