WILLEMSTAD.-Den un nota ku e partido a saka awe tardi, ku tin nòmber di lider polítiko Daniel Hodge i presidente di e partido Elvis Andrade, ta splika ku partido Democraat semper a para pa liderato responsabel i pa progreso di Kòrsou. Goberná un pais ta un responsabilidat grandi ku ta eksigí vishon, preparashon optimal, kapasidat i programanan ku ta brinda solushonnan duradero pa e desafionan grandi riba tur tereno, ku e komunidat ta konfrontá. Pa e motibunan aki DP a disidí ku nan lo no partisipá na elekshon dia 21 di mart próksimo.
E dirigentenan ta bisa ku no ta responsabel pa hiba un kampaña i bai elekshon awor aki, ademas e no ta kuadra ku e prinsipionan di Democraat. DP su prioridat ta pa prepará bon i traha riba plannan konkreto pa trese kambio real ku ta benefisiá pueblo. Nan ta konsiente ku e desishon aki por trese desilushon pa sierto hende pero nan ta konvensí ku ta mas mihó pa tuma tempu pa prepará bon. DP lo vigilá tur desaroyo i posibel impakto ku esakinan lo por tin riba bienestar di pueblo.
Democraat ta anhelá di mira un Kòrsou atrobe ku ta kana dilanti den Karibe manera ántes, un isla kaminda tur hende ta prosperá i niun mucha ta bai skol ku stoma bashí. DP ke mira Kòrsou kaminda tur hende tin mesun oportunidat pa bai dilanti i no e isla mas pober den reino, ni e isla kaminda e peso di impuesto ta mas haltu den reino.