WILLEMSTAD.- E pandemia di COVID-19 no solamente a kambia nos mundu pero Kòrsou tambe. Un di e manera mas efektivo pa protehá bo mes i esnan rònt di bo, pa e vírus di COVID-19 ta e bakuna. Pa manehá e registrashon di bakuna na un manera mas moderno, for di 11 di òktober Gobièrnu di Kòrsou a lansa e Curaçao Health App, riba kual por apliká pa e prueba digital di bakunashon (DCC) i e QR Code.

Aktualmente, un di e medidanan di prekoushon i prevenshon ku a keda tumá, ta ku ta rekerí e prueba digital di bakunashon (DCC) i e QR Code den forma digital òf den ‘hard copy’, na diferente sitio di dibershon i tambe na eventonan ku ta tuma lugá den un espasio definí ku kontròl na entrada.

Tambe ora di biahe, ta mas fásil pa biaha ku e prueba digital di bakunashon (DCC) i e QR Code en bes di e karchi di bakuna (hard copy).
Partido MAN ta konsiente ku pa hopi hende e ta un reto pa por apliká pa e prueba digital di bakunashon (DCC) i e QR Code importante aki i ta organisá un seshon kaminda esnan ku tin difikultat di registrá pa nan prueba digital di bakunashon (DCC) i e QR Code, por keda yudá.

Esaki lo tuma lugá djasabra 4 di desèmber di 9 or di mainta pa 12 or di mèrdia na Sede di Partido MAN na Rooseveltweg. Mester bini ku e ID (ku a usá ora a bakuná), e karchi di bakuna i bo telefòn. Si ta deseá, nos por print e QR Code tambe kompletamente grátis!

 

LAGA UN KOMENTARIO

Please enter your comment!
Please enter your name here