WILLEMSTAD.- Partidonan di oposishon na Venezuela djárason 15 di febrüari a duna di konosé ku lo organisá elekshon den luna di òktober e aña aki. Ku esaki e partidonan di oposishon ke skohe un kandidato ku por partisipá den elekshon nashonal pa un presidente nobo ku lo tuma lugá den aña 2024.
E preelekshon di partidonan di oposishon lo ta e promé for di 2012. Hugo Chávez na aña 2012 a gana elekshon presidensial na Venezuela. Na nòmber di oposishon eks gobernador Henrique Capriles a partisipá.
Intenshon di partidonan di oposishon konhunto awor ta pa kombatí presidente Nicolás Maduro den elekshon di 2024.
Partidonan di oposishon lo skohe un komishon ku 10 diferente persona. E komishon ke sinta ku representantenan di konseho di elekshon nashonal. Segun Jesus Maria Casal, na nòmber di partidonan di oposishon, lo demanda partisipashon den elekshon presidensial. Casal a bisa prensa ku mas ku dies persona a nominá nan mes kaba pa elekshon presidensial di oposishon.
Den aña 2018 partidonan di oposishon na Venezuela a bòikotiá elekshon presidensial. Maduro a gana elekshon den aña 2018, pero diferente pais na mundu – entre otro Estádos Unídos i Hulanda – ta di opinion ku e elekshon tabata froudulento. Mas ku 50 pais a duna di konosé ku nan ta mira Juan Guaidó komo representante di pueblo di Venezuela. Te ainda no ta konosí ki dia lo tin elekshon presidensial na Venezuela.
PORTRET Presidente di Venezuela Nicolás Maduro
