Pasahero malu a pone KLM hasi aterisahe emergensia

WILLEMSTAD.- Un avion di KLM ku a lanta buelo rumbo pa Kòrsou awe mainta, for di Amsterdam, mester a hasi un aterisahe di emergensia na e aeropuerto di Shannon, Irlanda. Ta trata di e buelo numerá KL0735 ku a lanta buelo ku intenshon di yega Korsou 14:30 awe mèrdia. E loke a hala atenshon ta ku e buelo aki a sali Amsterdam un ora i mei mas lat ku programa. Cees Ursem di KLM a konfirmá pa EXTRA ku e avion ku a sali Amsterdam pa bini Korsou mester a baha na Shannon i despues di baha e pasahero ku a bira malu e buelo a sigui su kurso pa Kòrsou. Ta spera yegada di e avion 18:55 ora di Kòrsou.

Ursem ta atribuí e situashon aki na lei di Murphy, esta ku ‘tur loke por bai robes, ta bai robes pareu’. E avion konserní a yega Schiphol lat for di un konekshon prome i esei a pone ku e buelo pa Kòrsou a sali ku retraso di un ora i mei. Pa nan di malu un pasahero a bira asina malu na bordo ku a opta pa baha na Shannon di manera ku por a transportá e pasahero ku urgensia pa hospital. Mas detaye riba posibel kousa di e malesa e representante di KLM no kier a duna.

Pa KLM importante ta e bienestar di e pasahero i pa e motibu ei a hasi un aterisahe di emergensia. Riba e pregunta si e desaroyonan di último oranan lo tin influensia riba otro vuelonan Ursem a bisa ku no. E buelo ku yega Kòrsou awe nochi 18:55 ta sali bek pa Ulanda 20:40.

SHARE

LEAVE A REPLY