Durante reunion na Peru
WILLEMSTAD.- Tin un delegashon di 3 parlamentario na Peru pa otro reunion di parlatino, e parlamento di latino Amérika i Karibe. Na Peru tin un enkuentro pa trata tópiko di energia duradero i protekshon di medio ambiente. Durante e enkuentro aki parlamentario pa partido PAR, Ana Maria Pauletta a hasi un petishon na kolega miembronan di pa ekspresá nan mes riba situashon na Venezuela i ku parlatino ta uni su mes pa protekshon di demokrasia na Venezuela.
E parlamentarionan ku a biaha pa Peru ta Fergino Brownbill (MFK), Gwendell Mercelina (PNP), ámbos miembro di e komishon Medio Ambiente i Turismo i Pauletta ku ta miembro di e komishon di energia i mina.
E reunionnan a tuma lugá djaweps i djabièrnè i e wikènt aki mes e parlamentarionan ta regresá Kòrsou. Gastu di biahe di parlamento ta punto di diskushon atrobe, prinsipalmente biahe pa reunionnan di parlatino i si nan ta di balor agregá.
Presidente di parlatino, Charetti America-Francisca a indiká ku e gastunan di biahe den promé mitar di 2024 tabata haltu. Di e 595 mil florin ku a reservá riba presupuesto, parlamento a gasta mas ku 500 mil florin den promé mitar di aña.
A sobra 85 mil florin riba presupuesto ku entretantu tambe lo ta ménos mirando biahenan pa parlatino ku a sigui tuma lugá den yüli i awor ougùstùs. Chèns ta grandi ku parlamento lo pidi ministerio di Finansa pa mas medio finansiero riba presupuesto pa por kumpli ku sobrá biahenan plania pa e aña ai.
Na òktober diferente komishon di parlatino ta reuní atrobe miéntras ku na desèmber tin selebrashon di 60 aña parlatino. Tambe tin reunion di Interexpo na Hulanda desèmber awor.
Venezuela
Durante di e reunionnan na Peru parlamentario Pauletta a hasi un petishon serka sobrá miembronan di komishon pa nan ekspresá nan mes riba e situashon na Venezuela. Despues di elekshon djadumingu 28 yüli último e situashon na Venezuela a keda tenso.
Riba su página di Facebook Pauletta ta ekspresá e speransa ku parlatino por uni su mes pa protehá demokrasia na Venezuela. E mustra na e manifestashonnan di protesta ku Venezolanonan ta tene entre otro na Peru i ta bisa ku e ta lamentá ku e no por tabata presente na e manifestashon ku a tuma lugá djaweps na Kòrsou.
Pauletta ta bisa di tin konfiansa ku gobièrnu di Kòrsou lo ekspresá su sosten pa protekshon di balornan demokrátiko manera gobièrnunan di Aruba i Hulanda a hasi na algun okashon kaba. Promé minister di Aruba, Evelyne Wever-Croes den su último komunikado di prensa riba e situashon na Venezuela a bisa ku ta ku meskos ku komunidat internashonal Aruba i Reino Hulandes tambe tin duda si e resultado final publiká ta reflehá e realidat di votashon i ta pidi pa transparensia.
“Mester respetá e boluntat demokrátiko di e pueblo di Venezuela mester. Tantu na Aruba komo den henter Reino, nos ta preokupá pa e desaroyonan desde djadumingu anochi despues ku publiká e anunsio ofisial di resultado di elekshon presidensial. Reino Hulandes ta uni ku komunidat internashonal ku ta hasi un apelashon pa transparensia kompleto den e proseso di elekshon y den e maneho di e resultado. Pa loke ta Aruba, nos ta preokupá i ta sigui e desaroyonan di e último oranan na Venezuela hopi di serka i ku hopi alerta.”
Konseho Nashonal Elektoral di Venezuela a proklamá presidente Nicolas Maduro ganadó di e elekshon ku 51 porshento di tur voto. Oposishon sinembargo ta bisa di tin prueba ku nan kandidato, Edmundo Gonzales a optené kasi 70 porshento di tur voto emití.
Merka entretantu ta bisa di tin pruebanan konvisente ku Gonzales a gana e elekshon i a bisa ofisialmente di ta rekonosé su persona komo e presidente nobo di Venezuela.
Foto:
…Ana Maria Pauletta…
