Promé Minister israelí Benjamin Netanyahu ta papia ku un pasahero di nòmber Yaniv, deskribí komo un dje pasaheronan ku a kibra drenta den cockpit dje avion di Flydubai kaminda tabatin un pelea entre piloto i ko-piloto. Un dje pilotonan ker a tumba e avion.
RIAD, Arabia Saudita (AFP).- Na momento ku e buelo FZ 1037 di Dubai pa Tel Aviv tabata aserká e frontera di hordano, e pasaheronan direpente a sa ku tabatin algu robes ku e avion te ku esaki hopi lihé a kuminsá pèrdè altura. Tabata “komo si fuera nos tabata den un turbulensia grandi, pero no tabatin turbulensia”, segun un pasahero a duna di konosé na Tabuki, den nortwèst di Arabia Saudita kaminda e avion a hasi un aterisahe di emergensia.
Segun datonan dje wèpsait di monitoring Flightrader, e avion direpente a baha for di un altura di 34.000 pia pa ménos ku 17.000 i esaki den apénas un minüt.
Di akuerdo ku un pasahero, “nos a komprondé ku un piloto a hinka un otro, ku e pasaheronan i miembronan di tripulashon mester a tuma kòntròl”. E promé minister israelí, Benjamin Netanyahu, ku a akudí na e aeropuerto Ben Gurion a elogiá e “héroenan ku a impedí un desaster mayor”.
Segun e pasahero Nazarovits, “nos tabata na punto di kai i ta danki na vários persona kendenan a neutralisá e kopiloto. “Esei a pone ku nos a yega ‘safe’”, segun un otro pasahero.
Investigashon dje suseso: E kompania Flydubai, ku sede na Emiratonan Arabe Uni, ayera nochi a informá ku te na e momento ei nan no tabatin informashon kon bin e dos pilotonan a bringa den cockpit durante dje buelo FZ 1073 ku destino pa Israel.
“Na e momento aki nos no sa e motibunan ku a kondusí na e insidente.
Nos lo hasi un investigashon formal. Nos ta pidi tur hende pa stòp ku spekulashonnan miéntras ku outoridatnan ta hasi nan trabou”, segun un bosero di Flydubai a bisa den un komunikado.
