Presidente guatemalteko, Bernardo Arévalo.
CIUDAD DE GUATEMALA (AFP).- Por lo ménos shete persona, entre nan un mucha muhé, a pèrdè nan bida ayera durante un enfrentamentu entre gènnan di trafikashon di droga. E choke a tuma lugá djadumingu anochi den e munisipio di Huité, na 30 km ost di e kapital guatemalteko. E víktimanan a muri na tres diferente sitio.
E pelea “a originá pa disputa di teritorio entre organisashonnan kriminal”, segun e bosero di ehérsito, Nathalia Mollinedo. “Ehérsito a skohe pa no drenta na e momentu ei, pa evitá un eskalashon”, segun el a agregá.
Ministerio públiko a duna di konosé ku na un dje munisipionan a topa un vehíkulo den kua tabatin tres morto, entre nan un menor di edat. Videonan riba retnan sosial i publiká pa prensa lokal ta mustra e yegada di un komando armá bistí ku ekipo militar. Na e momentu ei no por a bisa si enberdat ta trata di militarnan.
E enfrentamentnan ta tuma lugá un siman despues ku “Escudo de las Americas”, un aliansa regional antidroga liderá pa Merka i di kua Guatemala ta forma parti, a anunsiá un akuerdo pa investigá komo binti grupo kriminal. Ta hasi esaki ku beslag di kuentanan bankario, restrikshon di visa i otro medidanan. Mas aleu e insidente a tuma lugá despues dje promé entrega di armanan ku Washington a bende ku Guatemala.
E presidente sosial demokrat, Bernardo Arévalo, ta keda kritiká pa su polítika di seguridat, spesialmente pa e strategia kontra di gènnan ku den yanüari último a mata 11 polis. Su gobièrnu ta insistí ku e lucha kontra dje gruponan ei mester sigui pero sin kometé abusu i respetando derechinan humano.
