E área ku a keda afektá den e region suiso di Wallis, kaminda ku temperatura mas haltu ku normal ta lòs e gletsjernan.
GENEVE (AFP).- Outoridatnan suiso ta vigilá posibel riesgo di inundashon den un área zùit dje pais, despues ku un gletsjer enorme a bin abou i a destruí un pueblo chikitu. E insidente a tuma lugá djárason na e gletsjer di Abedul, den e region suiso di Wallis. El a destruí grandi parti dje pueblo Blatten, kaminda 300 persona tabata biba i kendenan a keda evakuá siman pasá.
Un hòmber di 64 aña kende tabata den e zona afektá na e momentu ei, ta pèrdí.
Ayera outoridatnan tabata teme ku mas eis lo a bin abou i basha den e lago artifisial ku a keda kreá, loke por provoká inundashon den hinter e pueblo..
Imágennan riba YouTube a mustra kantidat grandi di eis i piedra biniendo abou for di e serunan. E forsa i velosidat dje eis ku a lòs tabata asina fuerte ku el a krusa un área grandi i a bai topa ku un seru na e otro banda dje área kaminda e suseso a tuma lugá.
For di djaweps outoridatnan a deklará estado di emergensia den e zona pa vigilá e situashon despues ku un gletsjer enorme, di sigur dos kilometer, a blòkia e riu Lonza.
Komo medida di prekoushon, a evakuá 16 persona den dos pueblo hopi serka dje sitio.
E echo ku temperatura a subi a afektá e gletsjernan di Alphen i a hasi nan instabil.
