WASHINGTON, AP.- E inspektor di Departamento di Defensa merikano ta investigando un kontrakt di 400 mion dòler pa konstruí un muraya na frontera ku México, kual a wòrdu proveé na un empresa ku a haña e trabou despues di vários aparishon na e kanal, TV Fox News.
E inspektor general di Pentágono a manda un karta pa e presidente di e Komishon di Seguridat Nashonal di Kámara di Representante, Bennie Thompson, pa inform’é ku lo inspekshona e kontrakt ku empresa Fisher Sand and Gravel Co., a haña. E demókrata Thompson a pidi pa revisá e kontrakt dor ku e ofertanan no ta satisfasé e rekisitonan operativo i e prototiponan a yega lat i a superá e presupuesto.
Tommy Fisher, hefe di e empresa, a bisa djaweps ku “no tin nada di deskubrí” den e inspekshon.
E muraya na frontera ta un di e prioridatnan prinsipal di presidente Donald Trump, kende a hasi su kampaña primintiendo ku e lo konstruí “un muraya grandi i bunita” na frontera kual México lo paga p’e, i ku na final di 2020 lo konstruí entre 725 i 1.100 kilometer. México no a paga pa e muraya i te ku 1 novèmber a konstruí 125 kilometer di muraya.
