WILLEMSTAD.- Djabièrnè atardi siman pasá a e notisia ku ‘Peppie Sluis’ a fayesé na Colombia a shòk e komunidat Kultural di Kòrsou.
Selfried ‘Peppie’ Sluis, gran bailadó, lider di Grupo di Seú ‘Futuro i Memoria di Kòrsou’, lider di grupo di baile ‘Futuro i Memoria’ a fayesé di forma repentino.

Historia
“‘Peppie’ fo’i chikí tabatin talento den baile i pa desaroyá su abilidatnan el a afiliá su mes na na grupo di baile ‘Dushi Kòrsou’. Dia 1e di ougùstùs 1983 Peppie a presentá pa promé biaha  ofishalmente ku grupo di baile Dushi Kòrsou. El a forma parti te 26-06-2000 den grupo Dushi Kòrsou.
Durante ku e tabata militá di e grupo di baile Dushi Kòrsou e tabata forma parti tambe den komishon di mayor na Mgr. Niewindt College. Na 1997 a nasé grupo di Seú ‘Futuro di Kòrsou’ bou di guia di 2 dosente, yùfrou Ursula i yùfrou Virginie. Grupo di Seú Futuro di Kòrsou a kuminsá partisipá na Seú ku solamente 7 pareha.
Dia 26-06-2001 Peppie a lanta su propio grupo di baile Folklóriko Memoria di Kòrsou, ku tabata konsistí di  9 dama i 8 kabayero. Na 2005 Memoria di Kòrsou a bira un fundashon i el a uni e 2 nòmber nan komo: Futuro i Memoria di Kòrsou. Tur aña nan ta partisipá den Seú ku 150 miembro i na 5 okashon e grupo a gana é premio máksimo Reina di Seú.
For di e grupo di seú a sali hóbennan ku diferente talento manera kanto i baile. E hóbennan dinámiko aki a forma un kor di misa ku 3 tokadó Bari, Kachu i Chapi huntu ku 5 damsita di grupo komo korista. Awe nan ta konosí komo ‘Hóben na Timon’.
‘Peppie’ Sluis huntu ku su grupo ‘Futuro i Memoria di Kòrsou’ a duna presentashonnan lokal i tambe internashonal. Nan a yega di representá Kòrsou na Aruba; Santiago de Cuba; Atlanta; São Paulo, Brazil; St. Maarten; Barahona, República Dominicana; Boneiru i Venezuela.
‘Peppie’ tabata duna tayernan di baile folklóriko na diferente skol durante temporada di ‘Siman di Kultura’, esaki danki na e konfiansa ku semper Kas di Kultura tabatin den dje.
‘Peppie’ su meta semper tabata pa sigui konsientisá nos yunan di tera pa nan ta orguyoso di nan Kultura i pa huntu duna realse na nos Kultura i nos kustumbernan di ántes.

LAGA UN KOMENTARIO

Please enter your comment!
Please enter your name here