BEIJIN, CHINA (AFP).- Un tribunal di Beijing a kondená un periodista chines ku ta traha pa un medio estatal na shete aña di prizòn pa spionahe, segun su famia a indiká. Dong Yuhyu, di 62 aña, tabata skirbi editorial pa Guangming Ribao (Korant di klaridat), propiedat di Partido Komunista ku ta na poder.
El a keda detené den febrüari di 2022 huntu ku un diplomátiko hapones, na momento ku nan tabata almorsá den Beijing. E diplomátiko a keda liberá algun ora despues di interogashon, pero e periodista si a keda detené.
Segun e kaso, e diplomátikonan hapones ku kua Dong Yuyu a entrevistá, entre nan e embahador dje tempu ei, Hideo Tarumi, i e aktual responsabel diplomátiko chines radiká na Shanghai, Masaru Okada, a keda designá komo agentenan di un “organisashon di spionahe”.
“Nos ta konmoshoná pa motibu ku outoridatnan chines ta konsiderá di forma habrí un embahada estranhero komo “organisashon di spionahe” i ta akusá e eks-embahador hapones i su koleganan diplomátiko di ta spion”, segun nan ta bisa den un komunikado.
“Organisashonnan hudisial chines ta trata e asuntunan ei di forma estrikto konforme lei kontra esnan ku violá i kometé krímen òf infrakshonnan”, segun e bosero di Ministerio chines di Relashonnan Eksterior, Mao Ning.
Un total di 44 periodista ta prezu den China, segun un kalkulo hasí den desèmber di 2023 pa Komité di Protekshon di Periodistanan (CPJ), un organisashon ku sede na Merka.
