KARACHI, PAKISTAN, AP.- Periodistanan pakistani a realisá un dia di protesta den e pais kompleto kontra sensura di parti di servisionan di seguridat, retironan masivo dor di redukshon den presupuesto di e pais i retraso pa ku kobramentu di salario.
E sindikato Federal di Periodista, kende a organisá e protestanan a bisa ku e periodistanan a resolvé “pa kombatí e sensura” den e etapa mas represivo den e pais su historia.
Djamars tabata apénas “komienso di un mobilisashon di protesta”, asina presidente di e sindikato, Afzal Butt a atvertí.
Periodista i promotornan di libertat di prensa a bisa ku forsa arma ta preshoná medionan pa no publiká artíkulonan demasiado kritiko. E gobièrnu ku a kaba di wòrdu skohe ta redusiendo su presupuesto di publisidat, un fuente di entrada krusial pa kanalnan di televishon i korantnan priva.
Diferente periodista a pèrdè nan puesto di trabou pa problema finansiero di empresanan despues di e redukshon drástiko di e publisidat ofisial.
E gobièrnu no a hasi ningun deklarashon te ainda.
