Periodistanan kolombiano kendenan a keda asesiná e aña’kí. E agreshon kontra dje komunikadónan ta motibu di hopi preokupashon.
CIUDAD DE MEXICO (AFP).- Ayera periodistanan, aktivistanan i medionan a eksigí pa presidente Sheinbaum atendé e krísis di agreshonnan kontra komunikadonan na Méhiko, kaminda e aña’kí ya tabatin por lo ménos shete asesinato.
Méhiko ta un dje paisnan mas peligroso na mundu pa ehersé periodismo i gran parti dje asesinatonan i agreshonnan ta keda sin kastigu, segun reporte di diferente organisashon di derechinan humano. E reklamo, publiká pa e organisashon Reporteronan Sin Frontera (RSF) i respaldá pa mas ku 40 medio lokal, ta eksigí di Sheinbaum pa aktua kontra dje violensia konstante kontra dje gremio.
“Kuantu mas di nos mester muri pa Estado aktua? Méhiko no por kustumá di mester konta e kantidat di periodistanan asesiná”, segun ta menshoná den e dokumento.
E komunikadonan ta demandá pa seguridat nashonal den kua outoridatnan federal i lokal ta intervení, pa garantisá nan protekshon.
Segun RSF, durante dje presidensia di Sheinbaum, kende a sinta den òktober di 2024, a mata 17 komunikadór. Mas aleu ta referí na mas ku 180 krímen for di 2000.
Solamente den yüni i yüli último, a mata dos hende di prensa kada luna. A denunsiá otro agreshonnan, manera esun ku a tuma lugá djaluna anochi ora dos reportero a sali ileso di un agreshon despues ku a tira riba nan den e estado di Veracruz.
E gremio di prensa a hasi yamadanan similar riba Sheinbaum, kende su gobièrnu a karakterisá su mes pa pone un banda e krítikanan di prensa den su direkshon. Algun dia pasá, for di presidensia inkluso, a saka un lista di media i periodistanan ku ta keda señalá di ta fomentá informashon kontra di gobièrnu. Esnan señalá a denunsiá di a risibí agreshon riba diferente wèpsait, loke a keda minimalisá pa Sheinbaum. Pero finalmente e mandatario a komprometé su mes pa no bolbe publiká tipo di lista asina.
