Perseverá i bo ta logra; Na pia me lo dominá kaya den Marcha di Seú 2019

Fundashon Kultural Seú Kòrsou por mira tras riba otro   ku a kana bon i ku a konta ku un sintonia haltu pa loke ta trata esnan ku a sigui e transmishon via di televishon.

Sharrel su ‘Na pia Me’ ta pinta di bai bira un dje seúnan super popular i nos ta sigur ku e lo bai dominá kaya durante di e marcha di seú 2019.

 

Adjatay, e prínsipe afrikano…

Sharrel Denisia ku su nòmber artístiko Adjatay ku un sonrisa riba su kara i ku den tur trankilidat dominando kada palabra ku e saka, a konta Djasabra ken e ta i kiko por spera di dje. E nòmber Adjatay a sali di Amos Balentin. Dia Sharrel a drenta Vega nobo nobo Amos a bisé ku e tin di buska un nòmber artístiko. E tabata konosí komo Pacho pero Amos a preferá na tin un nòmber apart pa Sharrel, asina a yega na e nòmber Adjatay ku ta nifiká prínsipe den afrikano. Ta einan e nòmber Adjatay a kuminsá zona ku Sharrel formando parti di Vega.

 

E tin mas òf ménos 9 aña ta kanta ounke e no a kuminsá kanta for di chikí. E tabata kanta den kas i den skolnan pero no komo artista. Na 2009 tabatin un prueba di grupo karabela i su wela ku a mira e talento den dje a mand’e pa e bai. Asina el a drenta Karabela i despues a bai pa Ovega, sigui pa Dreams i awor e ta den Vega bèk.

 

Na Pia Me…

Ta un komposishon di Furgell Wijngaarde i mama Elia Isenia. E seú aki ta for di a aña pasá trahá pa Reinir Lijfrock pero e no por a bai mas kuné. Asina e komposishon a keda warda i mirando Adjatay su partisipashon na 2018 Furgell a pidié un chèns pa e komponé pe den Kantadó Mayó. Asina el a keda presentá ku Na Pia Me. Sharrel kier a sa kiko e ta nifiká i Furgell a splika ku ántes tur kos ta na pia, Seú ku e tokadónan di bari ku nan faha pasá rònt di nan barika, e tokadónan di kachu etc., etc. i p’esei e kier a bin ku e básiko bèk pero den tempu moderno.

Den e komposishon aki Sharrel a wak algun palabra basta fuerte i e tabata kier a haña mas splikashon di nan i serka ken otro ku no ta Mama Elia Isenia.

 

Sinti bo kansion….

Si abo komo partisipante kantadó mes no ta feel e seú, si bo noi por hinka bo mes den e letranan bo no por trese pa pueblo komprondé. I einan el a haña e splikashon pa e por a trese un bon seú ku pueblo a aseptá. Pa loke ta e palabranan fuerte Sharrel a splika di e palabranan ku mas hende ta puntr’é pa e splika nan;

 

Krenwá traha di pal’i Brasia kargá ku bonchi kunuku; Palu di Brasia ta un palu masha fuerte ku ta kue diferente forma i e ta e palu ku ta saka flor hel skur. Hopi hende ta brua den nan, kibrahacha ta esun ku ta saka e flor hel koló kla i Brasia esun hel koló skur. Den e krenwá ta hinka kosecha di abundansia i einan ta referí na bida. I den e seú e ta bisa “Sali kaya ban gradisí tata pa e kosecha”.

Kada Foya tin su zoya;  foya ta otro nòmber pa blachi. Kada foya tin su zoya ta ku kada blachi tin di zoya.

E pia den su kutisa; kutisa ta nifiká sandalia ku indjannan tabata traha ántes. Awor tin alpargata pero ántes ta Kutisa. E ta referí na e alpargata pero ta un sandalia di indjannan.

Hisa pia sali kunuku drenta patruli; patruli ta un hanchi smal mei mei di dos kura. I nan a kue hink’é den bachi kultural. I ta na pia bo ta drent’é.

Asina por splika mas i Sharrel a sinti su mes den e seú, el a kue e seú aki bras’é i a sintié di kurason i tur hende por a mira kon el a trese dilanti durante di Kantadó Mayó.

Mayoria di e palabranan Sharrel a bai buska nan nifikashon pero tabatin algun ku e tabata sa nan nifikashon. I asina e por a trese pa pueblo di Kòrsou i el a keda aseptá na un manera grandi ku e mes no a ferwaktu. Su aktuashon a laga pueblo komprondé presis kiko e kier a bisa ku e piesa.

 

Kansionnan, un siñansa….

Kansionnan ku ta bai Kantadó Mayó por ta un siñansa. Ora ta skibi un seú e ta manera un lès, asina Sharrel a bisa. El a splika ku bo ta siña hopi kos i un di e pilarnan manera Mama Elia ku konosé hopi, Sharrel ta bishitá hopi. Mama Elia sigur por duna splikashon amplio. Sharrel tin 6 aña partisipando den Kantadó Mayó sin klasifiká i despues el a kuminsá klasifiká, tres aña pasá el a kai den e 12 nan i aña pasá di tres finalista i awor ganadó. Mi a lucha i perseverá.

 

Esaki ta pone ku Sharrel otro aña lo mester ta mihó prepará ainda. Ya Furgell ta preparando algu ku e tim ku mama Elia aserka sigur lo keda huntu den e próksimo kantadó mayónan.

Adjatay ta yama danki na tur ku e para su tras entre nan Star Motors ku a dun’é un outo Haval pa e kore kuné den e dianan pa prepará pa e marcha di seú. E ta bisa ku e outo ta manera un hotèl riba wil. Tambe danki na su famia di Orírí kompleto i tambe na su famia mes tambe. I sigur danki na Ser Supremo pa e talento, forsa i energia ku e ta hañando. I tambe danki na Furgell i mama Elia, Jovendrik Kirindongo.

 

Na hóbennan i pueblo di Kòrsou Adjatay ta bisa pa keda semper mantené boso fe, lucha i perseverá i lo bo logra. Nunka entregá pero lucha i siña. Si e aña aki no a bai bon siña di dje i otro aña lo ta mihó.

 


Kompositor: Furgell Wijngaarden/Elia Isenia
Melodia: Furgell Wijngaarden
Areglista: Jovendrick Kirindongo
Agrupashon kultural: Grupo Orírí
Kantante : Sharrel (Adjatay) Denisia

 

Na pia me
Krenwa traha di pal’i brasia
Karga ku bonchi di kunuku
Hal’e

Na pia me no tei hal’e
Sali kaya ban gradisi p’e kosecha
Ban yena nos garoshi karga ku kosecha na abundansia
Si bo tin fe pia no por ninga

Kreador a krea mundu
I kunukero su kunuku
Awa a yobe tera a bona
Solo a Sali bonchi a hecha
Kada foya tin su zoya
Ranka nan ta rama broma
Pa ser humano komprondé
I yama danki p’e kosecha
Tata danki p’e kosecha
Man nan a koba tera
Man nan a sai simia
Man a pushe garoshi pa nos por hiba nos kosecha

Pia a pis’e maishi
Pia den su kutisa
Pia den alpargata
Na pia me no tei hal’e
Sali kaya ban gradisí p’e kosecha
Ban yena nos garoshi karga ku kosecha na abundansia
Si bo tin fe pia no por ninga

Na pia me nos te’i
Hisa pia Sali kunuku drenta patruli
Sha ka sha 2x Sha Na pia me no tei hal’e
 
Na pia me
At’e ko ta bai sinta
Hende nan ta wapa
Hende nan ta gosa
Wapa ban dilanti
At’e ko

Na pia me
Wapa ku mi ban
Brasa hala ban
Huntu nos ta bai
Hoo na pia nos ta bai
Hoo ku pia nos ta bai
Maske solo kima
Maske awa yobe
Push’e garoshi ban
Hal’e garoshi ban
K’e pia den su kutisa
K’e pia den alpargata

Pia pa ki mi tin bo
E kaminda ta largu pia no laga bai
Maske solo kima nos ta sigui wapa
Awa yobe nos ta sigui bai
M’a subi seru te baha ai ku pia te final

Na pia me
At’e ko ta bai sinta
Hende nan ta wapa
Hende nan ta gosa
Wapa ban dilanti
At’e ko
Na pia me
Wapa ku mi ban
Brasa hala ban
Huntu nos ta bai
Hoo na pia nos ta bai
Hoo ku pia nos ta bai
Hal’e 2x na pia me
Hal’e 2x na pia me
Maske solo kima
Maske awa yobe
Push’e garoshi ban
Hal’e garoshi ban
K’e pia den su kutisa
K’e pia den alpargata
Ku pia nos ta bai

 

Nifikashon di palabra:
Foya – Otro nòmber pa blachi
Kutisa – Un sandalia ku indjan nan tabata tra
Patruli – un hanchi smal mei mei di dos kura

 

SHARE

LEAVE A REPLY