LIMA, AP.- E eks mandatario peruano Alan Garcia a muri djárason mainta, den un episodio ku a konmoshoná e nashon suramerikano. Garcia a tira su mes den kabes na momentu ku polis tabata preparando pa arest’é pa delito di labamentu plaka relashoná ku e kompania di konstrukshon brasilero Odebrecht.
E anunsio di su morto a kousa un tristesa profundo entre su siguidónan. Un grupo di forense a presentá na e sitio pa realisá un outopsia dor ku su morto tabata unu violento.
Esaki ta e promé kaso di un polítiko konosí den Suramérika ku ta kita su bida miéntras ku e ta wòrdu investigá pa korupshon relashoná ku e kaso Odebrecht. E fiskalnan ku ta investigá e élite polítiko peruano lo entrevistá Jorge Barata na Brasil otro siman. Barata ta eks gerente di e kompania di konstrukshon na Perú, kende mester duna kontesta riba preguntanan tokante Garcia.
Un dia promé ku su suisidio, Garcia a bisa ku e ta un kristian i ku e no tin miedu pa wòrdu detené, durante un entrevista ku e radio lokal RPP.
Segun fiskal, e eks presidente a risibí 100.000 dòler di Odebrecht, kual a wòrdu deskribí komo pagonan pa un konferensia ku Garcia a hasi na São Paulo na aña 2012.
E eks presidente a purba evadí hustisia, drentando e embahada di Uruguay na Lima i pidiendo asilo pa persekushon polítiko. Su pedido a wòrdu rechasá pa e gobièrnu di presidente uruguayo Tabare Vazquez.
Garcia a goberná Perú na dos okashon. E promé biaha tabata entre 1985 i 1990 na momentu ku el a bandoná su puesto lagando e pais den un krísis ekonómiko grave. El a bolbe goberná durante e periodo 2006-2011.
