LIMA, AP.- E eks presidente peruano Alberto Fujimori lo bolbe na e mesun prizòn kaminda el a keda enkarselá durante un dékada. E transferensia lo sosodé na momentu ku dòkternan personal outorisá esaki i firma pa e bandoná e klínika na Lima, kaminda e ta interná.
E agensia estatal ku ta atministrá prizòn na Perú a anunsiá ku e mandatario lo wòrdu detené den e mesun prizòn kaminda el a keda entre 2007 pa 2017. E prizòn aki, kaminda e ta e úniko prisionero, tin dòkter, tres enfermero i “un vehíkulo multiuso pa traslado na un sentro ku ta proveé atenshon médiko spesial”.
Hues Jorge Salas a ordená pa buska un prizòn kaminda por monitòr salú di Fujimori, di 80 aña, afektá ku problema di kurason i preshon haltu.
Fujimori a haña un indulto humanitario na aña 17, liberando e di un kondena di 25 aña di prizòn pa morto di 25 peruano den dékada 1990. E víktimanan a muri na man di un team formá pa militarnan durante su gobièrnu. Famia di e víktimanan a pidi hustisia peruano pa revisá e indulto, kual a wòrdu anulá den òktober 2018.
Fujimori a goberná Perú entre 1990 i 2000. Huntu ku su kondena pa asesinato e tin mas sentensia pa korupshon.
