LIMA, PERU (AFP).- Perú, un dje mayor produktornan mundial di blachi di kokaina, a eradiká mas di 6.000 hèktar di plantashon ilegal dje mata kual a keda sembrá entre yanüari pa yüni.
“En total a eliminá komo 6.032 hèktar di plantashon ilegal di koka destiná pa produkshon dje droga”, segun a keda indiká pa e ministerio di Interior den un komunikado.
Segun outoridatnan, ku e kantidat eliminá a invitá e potensial produkshon di 55.2 tòn di klorhidrato di kokaina. E blachi di kokaina ta e prinsipal material prima ku narkotráfiko ta usa pa elaborá kokaina.
Gobièrnu peruano tin komo meta pa eliminá alrededor di 25.000 hèktar den 2024, kompará ku 22.500 hèktar di 2023. E lucha kontra di narkotráfiko ta un dje prioridatnan di su gobièrnu, segun e presidente peruano Dina Boluarte.
“E gobièrnu aki ta sigui den su lucha kontra di pobresa, korupshon, desigualdat, inseguridat i narkoterorismo”, asina el a duna di konosé.
Segun e Komishon Nashonal pa Desaroyo i Bida sin Droga (Devida), e áreanan plantá ku mata di kokaina den 2022 tabata den kareda di 95.000 hèktar kompará ku 80.000 den 2021.
Ta kalkulá ku Perú ta produsí den kareda di 400 tòn di kokaina pa aña. Huntu ku Bolivia i Colombia, nan ta e mayor produktornan di blachi di kokaina na mundu.
