LIMA, PERU, AFP.- Perú a vota ayera pa skohe un presidente nobo entre 18 kandidato un dia despues ku e pais a reportá e kantidat di mas haltu di infekshonnan di COVID. Ademas, outoridat a reportá e kantidat di mas haltu di mortonan djadumingu.
Outoridat a reportá 384 morto den 24 ora djasabra, oumentando e total na mas di 54.600 den e pais ku 33 mion habitante. Te ainda outoridat a registrá 1.6 mion infekshon di COVID despues ku outoridat a reportá 11.200 kaso diario di Corona vírus.
Pero maske ku e kantidat di infekshonnan i morto ta subiendo, e gobièrnu di Perú a kontinuá ku e elekshon, kompará ku Chile kual a posponé e votamentu pa motibu ku e kasonan di infekshon tabata subiendo kousá pa e variantenan nobo ku ta mas kontagioso.
Míles di sentro di voto a habri nan porta for di 7 or di mainta i lo keda habri durante 24 ora pa evitá aglomerashon di votadónan.
