E momento ku presidente di FIFA, Infantino, a sorprendé mundu kompleto entregando e loke el a yama “Premio di Pas” di FIFA na presidente merikano Donald Trump.
LAUSANA, Suisa (AFP).- Sinkuenta diputado europeo ta preshoná FIFA pa investigá e otorgamentu di un “Premio di Pas” di parti di Gianni Infantino na e presidente merikano Donald Trump. Ku esaki nan ta duna apoyo na un petishon ku a keda entregá den luna di desèmber último di parti dje organisashon di defensa di derechinan humano Fairsquare.
E organisashon britániko ta akusá e presidente di futbòl mundial Infantino di a violá su “deber di neutralidat”, imponé den artíkulo 15 dje kódigo étiko di FIFA, pa aktua na fabor di Trump.
E organisashon ta pidi en partikular e komishon di étika pa “eksaminá e sirkunstansianan “ relashoná ku atribushon di “Premio FIFA di Pas” den novèmber di 2025 na e presidente di Merka. Nan ta mustra riba e echo ku nunka a splika e kriterionan i e prosedura no a keda klarifiká di parti dje federashon mundial di futbòl.
FairSquare a skirbi ku “e karta akí ta e intervenshon mas signifikativo di polítikonan europeo responsabel kontra e abusu di maneho i e violashonnan dje reglanan dje entidat na kabes di futbòl mundial for di despues ku Parlamento Europeo, den 2015, a pidi e retiro di Sepp Blatter”, kende ta e predesesor di Infantino.
Den un karta di djaluna último, 50 diputado di 13 pais europeo, prinsipalmente sosial demokratnan i liberalnan, a hasi un yamada riba Komishon di Étika di FIFA pa hasi un investigashon mas lihé i sinsero posibel, pidí for di shete luna pasá di parti di Fairsquare.
“Miéntras ku bista di mundu ta klabá riba e Mundial di FIFA, e petishon akí ta representá un okashon pa FIFA demostrá su kompromiso na fabor di neutralidat polítiko, transparensia i responsabilidat”, segun e firmantenan. Ta trata dje irlandes Barry Andrews, e hulandes Lara Wolters i e danes Niels Fuglsang.
Superb blog entry Moto X3m! Highly thorough and perceptive. I seek to get further knowledge.