WILLEMSTAD.- Frakshon di MAN-PIN ta hasi un proposishon konkreto pa implementá insentivo fiskal pa pa produktonan i sistemanan ku por sigui funshoná riba energia solar. Lider di frakshon di MAN-PIN, Giselle Mc William, den un karta pa Promé Minister Gilmar ‘Pik’ Pisas ta duna di konosé ku den e último dianan Kòrsou a konfrontá ku interupshonnan den suministro di koriente. Esaki a afektá tantu famia komo negoshi i institushonnan na Kòrsou.
“E apagónnan ta kita hende su komodidat, pero tambe inseguridat, pèrdida di produkto, daño na aparato i problema pa hende ku ta dependé di koriente pa nan trabou i bienestar,” e lider di frakshon di indiká. Mas aleu, Mc William ta bisa ku a tuma nota tambe ku Pisas a hasi un yamada na pueblo pa invertí den fèn solar, komo un manera pa prepará nan mes mihó pa momentu ku tin apagón. “Nos ta apoyá e idea di stimulá pueblo pa buska solushonnan di energia alternativa. Sinembargo, pa gobièrnu realmente stimulá pueblo invertí den teknologia solar, gobièrnu mester hasi e invershon den aparatonan asina aksesibel pa mas hende.”
Pa e motibu akí frakshon di MAN-PIN ta pidi Pisas pa konsiderá ku urgensia un pakete di insentivo fiskal pa produktonan i sistemanan ku por funshoná riba energia solar, manera: fèn ku por funshoná riba energia solar, èrko ku ta kompatibel ku energia solar i sistemanan di bateria, baterianan pa almasená energia solar, pènelnan solar i sistemanan di energia solar, flèshlait i lantèrnanan ku ta karga via energia solar, ‘powerbanks’ i sistemanan portabel di energia solar, i otro aparato esensial ku por funshoná durante un apagón sin dependé direktamente di e ret eléktriko.
Entre e medidanan ku e frakshon ta proponé ta: redukshon òf eliminashon di impuesto riba importashon di aparato i sistemanan ku ta funshoná riba energia solar, redusí e OB òf stipulá esaki na 0 porshento na entrada pa produktonan di energia solar ku ta konsiderá esensial pa uso doméstiko, dedukshon fiskal pa famia i negoshi ku invertí den pènel solar, bateria i otro sistemanan di respaldo, i insentivo spesial pa negoshinan i institushonnan, inkluyendo skolnan, kasnan di kuido i organisashonnan sosial pa invertí den energia solar i bateria. MAN-PIN ta kere ku un medida asina no ta solamente un kontesta pa e apagónnan resien i ta un mihó preparashon pa kalamidatnan klimatológiko, pero ta parti di un strategia mas amplio pa independensia energétiko, sostenibilidat i resilensia di Kòrsou.
“Si gobièrnu ta bisa pueblo: kumpra fèn solar pa yuda bo mes durante apagón, e pregunta konforme artíkulo 96 di Reglamento di Òrdu ta: Ki insentivo gobièrnu ta duna e pueblo pa e por yuda su mes kurpa kontra interupshon den suministro di koriente. Ta den e kuadro aki MAN-PIN ta pidi Minister Presidente pa presentá un plan konkreto ku insentivo fiskal i otro medida di apoyo, preferiblemente ku un término di implementashon kla, pa pueblo por prepará mihó i pa por redusí dependensia riba e ret eléktriko durante situashonnan di emergensia.
