WILLEMSTAD.-Ministerio di Tráfiko, Transporte I Planifikashon Urbano (VVRP) a anunsiá ku e kompania CSA Curaçao Holding NV a hasi petishon pa konstrukshon di un “fish farm” (viskwekerij) den e área di airopuerto, a base di e artíkulo 20 e.v. Landsverordening maritieme Beheer (P.B. 2007 no.18).
‘Fish farm’ no ta algu nobo, den pasado resien ya tabatin fish farm na Kòrsou. Tilapia ta entre e piskánan ku tantu aki komo na Boneiru a keda produsí den e proyektonan aki. Na vários parti di mundu ta produsí piskánan manera salmou, forel i zeebaars, i ta realisá esaki den nètnan ku ta drif den laman, miéntras ku nan ta ankra den fondo di laman di awa salu. Ta produsí otro tipo di piska den mesun sistemanan ku awa dushi.
Investigashon riba e materia ta mustra ku na mundu tin hopi pais ku tin un “aquatische viskwekerij”. Esnan mas grandi ta dominá pa nan durabilidat, teknologia inovativo i produkshon na gran eskalá. Ekspertonan ta mustra ku e sistema aki ta yuda produkshon di piska mundialmente i asina mantené e kantidat di piska den awanan rònt mundu.
E paisnan ku tin e “fish farm” mas duradero, inovativo i grandi ta Noruega ku Mowi (salmou), Hulanda na Zeeland(tarbot & Dutch Yellowtail) i tambe Bèlgika (Omegabaars).
