BOGOTA (AFP).- Presidente di Colombia, Gustavo Petro, ayera a defendé su mes kontr’e un ola di kritiká di sektornan feminista despues ku a publiká su movishonnan finansiero den kua por a tuma nota di pago den un klup di striptease na Portugal den 2023. E mandatario iskierdista e siman aki a publiká su kuentanan bankario komo prueba kontra di akusashonnan di narkotráfiko i labamentu di plaka lansá pa Donald Trump, loke a inkluí su persona i i su famia riba un lista di Departamento di Finansa ku fuerte sanshonnan finansiero.
Den e dokumentonan ta aparesé un pago di 50 dollar den un negoshi identifiká komo “Menage Strip Club”, un bar erótiko di Lisboa, den mei di 2023 durante di un gira ofisial na Europa. E insidente aki a konta ku rechaso di sektornan ku ta referí na e mandatario di a pronunsiá diskursonan machista i di tin komportashon no apropiá ku hende muhé.
“Kon ta posibel ku nos tin un krísis di eksplotashon seksual na Colombia i na mes momento un presidente ku ta atendé ku prostituta?”, segun pregunta dje aktivista Sara Jaramillo,kende ta boga pa eliminashon di trabou seksual konsiderando esaki un eksplotashon di hende.
“Tin dos kos ku m’a siña den mi bida, no drumi ku muhé pa kua mi kurason no ta sinti nada, i pa no kumpra sèks miéntras ku ainda mi ta kapas di sedusí”, segun Petro a sirbi riba X, loke a sòru pa te hasta mas krítika.
“Algun dia lo mi konta di kon m’a gasta 40 euro na e sitio ei”, el a bisa. ”Pero na e momento aki mi ta interesá pa tur esnan ku ta eksaminá mi kuenta, por mira kiko ta keda hasí kontra di Colombia”, segun e mandatario, refiriendo na sanshonnan di parti di Merka.
