Presidentenan Donald Trump (r) i Gustavo Petro, di Merka i Colombia, respektivamente, parse di a hasi bon ku otro.
BOGOTA, Colombia (AFP).- E presidente iskierdista di Colombia, Gustavo Petro, ayera a duna di konosé di a haña bèk e visa norteamerikano te ku final di su mandato den ougùstùs, despues di su aserkamentu ku Donald Trump. Meimei di un guera di palabra entre e mandatarionan, Washington den sèptèmber último a kita e visa merikano for di Petro i a apliká sanshonnan ekonómiko kontra dje presidente kolombiano i vários miembro di su famia. Inkluso Trump a menasá ku akshonnan militar na Colombia despues dje akshon norteamerikano ku kaptura di Nicolas Maduro dia 3 di yanüari na Venezuela.
“A duna mi bèk mi visa komo presidente te ku final di mi mandato”, segun Petro a skirbi riba X. E ta bandoná presidensia dia 7 di ougùstùs, sin posibilidat di re-elekshon. Tambe el a pidi pa kita su nòmber for di e ‘black list’ di OFAC, usá spesialmente kontra di narkotrafikantenan grandi, teroristanan i diktadornan, loke ta hasi ku ta bira difísil pa nan tin kuentanan bankario na Merka, miéntras ku tambe ta blòkia eventual propiedatnan ku nan tin riba teritorio norteamerikano.
Gobièrnu di Trump den 2025 a kita e sertifikashon di Colombia komo aliado den e lucha antidroga, konsiderando ku e pais no ta hasi sufisiente esfuerso pa kombatí e poderoso gruponan narko i detené e trafiká di kokaina direkshon pa Merka.
Washington no a inkluí Bogotá den e asina yamá “Eskudo di Amérika”, un aliansa di 17 pais dje kontinente kreá resientemente pa enfrentá e menasanan di seguridat.
