Presidente colombiano Gustavo Petro.
BOGOTA (AFP).- Gobièrnu di Colombia ayera a anunsiá di lo reanudá negosiashon di pas ku Clan del Golfo, suspendé di parti dje ‘cartel’ dos siman pasá komo protesta pa e akuerdo dje presidente iskierdista Gustavo Petro ku Donald Trump. E mandatario a hasi un bishita na White House dia 3 di febrüari pa realisá labornan konhunto pa por pone man riba alias “Chiquito Malo”, e máksimo komandante dje grupo di narkotrafikante.
E akuerdo a pone ku Clan del Gofo a para e diálogo ku nan tabata hiba ku gobièrnu kolombiano for di sèptèmber na Qatar. E ofisina di pas i gobièrnu a informá ku a negoshadónan a reuní dia 9 di febrüari na Bogotá i a ”superá” e suspenshon di kombersashonnan.
E proseso di pas “ta sigui avansá”, segun e ofisina den un komunikado. Petro a entregá na Trump un lista dje prinsipal hefenan narko di Colombia pa kua e ta spera na risibí apoyo di servisionan di inteligensia di Merka pa detené nan. E kabesantenan di Clan del Golfo a konsiderá ku e akuerdonan ei ta representá un ”atentado” kontra nan “buena fe” i a lanta for di mesa di negosiashon na Doha.
“Presidente Petro a pone su interesnan personal riba e “bon di mas grandi”, ku ta e pas den e teritorionan”, segun e hefe negoshadó dje trafikantenan a bisa na e momento ei.
Entre e narkotrafikantenan ku Petro i Trump ke bringa ta figurá Iván Mordisco, e lider dje grupo di disidentenan di FARC, e grupo armá ku a firma e pas ku e gobièrnu den 2016, i Pablito, un dje hòmbernan mas fuerte dje gueria ELN na e grèns ku Venezuela. Chiquito Malo a bai para na kabes di Clan del Golfo despues di kaptura di Otoniel den òktober di 2021. E kapo a keda kondená na 45 aña di prizòn na Merka.
