MERKA, WASHINGTON, AFP.- Preis di petroli a kita for di e tendensia di baha i a subi atrobe djaweps, despues ku invershonistanan a kuminsá tin mas duda tokante e posibilidat ku Merka i Iran por yega na un akuerdo ku lo permití normalisá e tráfiko marítimo den e Estrecho di Ormuz.
E preis di un bari di petroli Brent di laman di Nort pa entrega na òktober a subi ku 3,83%, yegando na US$82,49.
Su ekivalente merikano, e barí di West Texas Intermediate (WTI) pa entregá na sèptèmber, a subi ku 2,75%, te na US$77,29.
Iran a anunsiá djárason ku a yega na un akuerdo ku e Sultanato di Omán tokante un ruta nobo di nabegashon pa barkunan ku ta pasa pa e Estrecho di Ormuz, kaminda tur dos pais tin kosta.
Sin embargo, segun vários publikashon di prensa, e proyekto lo inkluí kobro di tarifa na barkunan, algu ku Merka no ta aseptá.
“Tambe tin menshon ku barkunan di Merka òf Israel no lo por transitá dor di e estrecho,” algu ku, segun John Kilduff, analista di Again Capital, “no ta eksaktamente loke e merkado tabata sperando.”
Segun e analista, “e situashon ta leu di wòrdu resolvé i no por konfiá hopi riba speransa.” P’esei e merkado a moderá su optimismo tokante kon e situashon por evolushoná.
