Presidente merikano Donald Trump
WASHINGTON, MERKA, AFP.- Preis di Petroli a baha djaluna despues ku Iran i Merka a tuma un ‘break’ di ataká otro. Tambe esaki a influensiá e optimismo di Donald Trump riba e negosiashonnan ku Iran. Esaki a duna invershonistanan mas konfiansa.
E preis di Brent, pa entregá den sèptèmber, a baha ku 8,70% te na 88,36 dòler.
Su ekivalente merikano, Wèst Texas Intermediate (WTI), pa entregá den mesun luna a baha ku 7,50% te na 82,61 dòler.
No a registrá interkambionan di bombardeo entre Merka i Iran desde djasabra despues di dos siman di atakenan violento.
Sinembargo, Saudi Arabia, aliado di Washington, a afirmá djaluna ku a interseptá un atake ku ‘drone’, lansá desde Irak, pa gruponan pro iraní.
Trump a bisa djaluna ku e probabilidat pa yega na un akuerdo ku Iran ta haltu.
Fin di siman pasá Brent a yega 100 dòler, algu ku no a sosodé desde luna di mei.
Tráfiko marítimo den estrecho di Hormuz, kual Tehran ke purba kontrolá, ainda ta hopi limitá.
