OM: Esaki ta medida di protekshon di derecho di víktimanan
Repúblika Dominikana.-Ofisina di Prokurador General di Repúblika Dominikana a tuma medida despues di risibí informashon ku e empresario dominikano Antonio Espaillat Lopez, doño di e diskoteka Jet Set, lo ta tratando na hasi kambia na propiedatnan for di su nòmber. PG ta interpretá e akshonnan di Espaillat komo strategia pa evitá pago di kompensashon na e víktimanan di Jet Set, despues ku a dak di betòn a kai aden matando algun shen persona i lagando hopi mas herida. Komo tal e ofisina di PG a inisiá vários prosedura hurídiko, riba e propiedatnan di Espaillat komo parti di e investigashon, asina Listin Diario ta informa.
PG Wilson Camacho a duna òrdu pa kuminsá prosedura kontra di e empresanan Inversiones E i L SRL, i tambe Jet Set Club i otro propiedatnan di Antonio Espaillat. E tragedia di Jet Set a kousa morto di 232 persona miéntras ku 180 a resultá herida.
Entre e deligensianan tin un medida pa intervení i paralisá kualke traspaso di propiedatnan di e empresario pa otro nòmber. Ministerio Públiko ta splika ku esaki ta un medida di protekshon pa derecho di víktimanan. E kaso di 8 aprel último a kousa impakto grandi no solamente na Repúblika Dominikano pero den vários otro parti di mundu. E artista grandi di merengue Rubby Perez tambe a muri den e kaso aki.
Tin un investigashon ku ta konsentrá riba e empresanan di Espaillat spesialmente esnan ku ta liga na e sentro Jet Set, un nòmber grandi den ‘night life’ di Repúblika Dominikana.
Ounke ku Espaillat a deklará ku e ta koperá 100% ku hustisia, outoridatnan hudisial a disidí na tuma e medida ya menshoná. OM a kuminsá revisá dokumentunan manera seguronan, pèrmitnan i e kondishon di e edifisio. Konforme lei di e pais OM ta esun responsabel pa protekshon di víktima i testigunan.
